పారితోషికం తిరిగిచ్చేసిన ఎన్టీఆర్.. త్రివిక్రమ్ హ్యాపీ!!

మాటల మాంత్రికుడు త్రివిక్రమ్ శ్రీనివాస్‌తో యంగ్ టైగర్ మరోసారి జతకట్టిన విషయం తెలిసిందే. ఇది ఎన్టీఆర్ 30వ సినిమా. హారిక అండ్ హాసిని క్రియేషన్స్, ఎన్టీఆర్ ఆర్ట్స్ బ్యానర్లపై ఎస్.రాధాకృష్ణ, నందమూరి కళ్యాణ్ రామ్ నిర్మిస్తున్నారు. ఇప్పటికే ఎన్టీఆర్, త్రివిక్రమ్ కాంబినేషన్‌లో ‘అరవింద సమేత వీర రాఘవ’ వంటి హిట్ మూవీ రావడంతో NTR30 పై అందరికీ ఆసక్తి నెలకొంది. ఈ సినిమాలో ఎన్టీఆర్ సరసన రష్మిక మందనను తీసుకున్న సమాచారం. అంతేకాదు, మలయాళ సూపర్ స్టార్ మోహన్‌లాల్ ఓ ముఖ్య పాత్ర పోషించనున్నారని ప్రచారం జరుగుతోంది. ఇదిలా ఉంటే, కరోనా వైరస్ కారణంగా లాక్‌డౌన్ ఏర్పడటంతో షూటింగ్‌లన్నీ ఆగిపోయాయి. ప్రస్తుతం షూటింగ్‌లకు ప్రభుత్వాలు అనుమతులు ఇచ్చినా వైరస్ వ్యాప్తి కారణంగా స్టార్ హీరోలు ధైర్యం చేయలేకపోతున్నారు. అయితే, భారీ బడ్జెట్ చిత్రాల షూటింగ్‌లు తాత్కాలికంగా ఆగిపోవడం వల్ల దాని ప్రభావం నిర్మాతలపై పడుతోంది. అప్పుగా తీసుకొచ్చిన కోట్ల రూపాయలకు నిర్మాతలు వడ్డీలు కట్టుకోలేక ఇబ్బంది పడుతున్నారు. ఈ నేపథ్యంలో తమ నిర్మాతలను ఆదుకోవడానికి జూనియర్ ఎన్టీఆర్ ముందుకొచ్చారని ఇండస్ట్రీ వర్గాల సమాచారం. Also Read: ప్రస్తుతం ఇండస్ట్రీ నుంచి వస్తోన్న సమాచారం ప్రకారం, NTR30 సినిమా కోసం అడ్వాన్స్‌గా తీసుకున్న పారితోషికాన్ని నిర్మాత ఎస్.రాధాకృష్ణ (చినబాబు)కు ఎన్టీఆర్ తిరిగి ఇచ్చేశారట. ఈ సినిమాను సైన్ చేసినప్పుడు ఎన్టీఆర్ రూ.8 కోట్లు అడ్వాన్స్‌గా తీసుకున్నారని సమాచారం. ప్రస్తుతం షూటింగ్‌లు లేకపోవడం, వడ్డీలు కట్టుకోవడానికి నిర్మాత చినబాబు ఇబ్బంది పడటం చూసి ఆ మొత్తాన్ని ఎన్టీఆర్ తిరిగి ఇచ్చేశారని అంటున్నారు. ఎన్టీఆర్ తీసుకున్న నిర్ణయం పట్ల దర్శకుడు త్రివిక్రమ్ చాలా సంతోషం వ్యక్తం చేశారట. ఎందుకంటే, చినబాబుతో త్రివిక్రమ్‌కు మంచి అనుబంధం ఉంది. గడిచిన కొన్నేళ్లలో త్రివిక్రమ్ దర్శకత్వం వహించిన చాలా సినిమాలకు చినబాబు నిర్మాణ భాగస్వామిగా ఉన్నారు. కొన్ని సినిమాలను స్వయంగా నిర్మించారు.

from https://ift.tt/3hlTArF