RRRపై 'చిరు' ప్రభావం.. విడుదల తేదీపై అనుమానాలు!

రామ్ చరణ్, ఎన్టీఆర్ హీరోలుగా రాజమౌళి దర్శకత్వంలో ఎంతో ప్రతిష్టాత్మకంగా రూపొందుతోన్న RRRపై చిరంజీవి ఎఫెక్ట్ పడిందని, ఆ కారణంగా సినిమా విడుదల మరోసారి వాయిదాపడే అవకాశాలున్నాయని వార్తలు వస్తున్నాయి. కొరటాల శివ దర్శకత్వంలో చిరంజీవి చేస్తున్న 'ఆచార్య' సినిమానే ఇందుకు కారణం అని చెప్పుకుంటున్నారు. అదెలాగంటే.. ఆచార్య మూవీలో రామ్ చరణ్ కూడా ఓ కీలకపాత్ర పోషిస్తున్న సంగతి తెలిసిందే. అయితే ఈ లాక్‌డౌన్ పూర్తయిన వెంటనే రామ్ చరణ్, 'ఆచార్య' సెట్స్ మీదకు వెళ్లనున్నారని టాక్ నడుస్తోంది. ఈ మేరకు షూటింగ్‌కి కొద్దిరోజుల పాటు బ్రేక్ ఇచ్చే అవకాశాలున్నాయని అంటున్నారు. గత రెండు మూడు రోజులుగా సోషల్ మీడియాలో ఈ వార్తలు షికారు చేస్తుండటంతో RRR మరోసారి వాయిదా పడటం ఖాయం అనే మరో వార్త పుట్టుకొచ్చింది. 'ఆచార్య' కోసం రామ్ చరణ్ డేట్స్ ఇచ్చారు కాబట్టి RRR మిగిలిన భాగం షూటింగ్ ఆలస్యం కావడం, తద్వారా ఆ ఎఫెక్ట్ విడుదల తేదీపై పడే ఆస్కారముందని అంటున్నారు. ఇప్పటికే ఈ సినిమా విడుదలను ఓ సారి వాయిదా వేశారు రాజమౌళి. మూవీ ప్రారంభంలో 30 జులై 2020నే విడుదల చేస్తానని ప్రకటించిన ఆయన.. కొన్ని అనివార్య కారణాల వల్ల 2021 జనవరి 8వ తేదీకి వాయిదా వేశారు. ఇప్పుడు ఈ డేట్ కూడా కష్టమే అనే వార్తలు రావడం మెగా, నందమూరి అభిమానులను నిరాశకు గురిచేస్తున్నాయి. డీవీవీ దానయ్య సమర్పణలో రూపొందుతున్న RRR చిత్రానికి ఇటీవలే 'రౌద్రం రణం రుధిరం' అనే టైటిల్ కన్ఫర్మ్ చేస్తూ మోషన్ పోస్టర్ రిలీజ్ చేశారు జక్కన్న. ఈ పోస్టర్ సినిమాపై ఉన్న అంచనాలను అమాంతం పెంచేసింది. 1920 బ్యాక్‌డ్రాప్‌లో రాబోతున్న ఈ చిత్రంలో అల్లూరి సీతారామరాజుగా రామ్ చరణ్ నటిస్తుండగా, కొమురం భీం రోల్ ఎన్టీఆర్ పోషిస్తున్నారు. ఆలియా భట్, ఒలీవియా మోరిస్ హీరోయిన్లుగా కనిపించనున్నారు.

from https://ift.tt/3cc9SAd