ఇలాంటి రోజు వస్తుందని అనుకోలేదు.. పోలీసులతో విజయ్ దేవరకొండ వీడియో కాన్ఫరెన్స్

ప్రపంచాన్ని వణికిస్తోన్న కరోనా మహమ్మారి మన దేశంలోనూ ప్రతాపం చూపిస్తోంది. అయితే, ఈ భయంకర వైరస్‌ మరింత వ్యాప్తి చెందకుండా కేంద్ర, రాష్ట్ర ప్రభుత్వాలు లాక్‌డౌన్ విధించాయి. దేశవ్యాప్తంగా ఇప్పటికే 21 రోజుల లాక్‌డౌన్ పూర్తయింది. మరో 19 రోజుల పాటు ఈ లాక్‌డౌన్‌ను కొనసాగించాల్సిన అవసరం ఉందని ప్రధాన మంత్రి నరేంద్ర మోదీ సోమవారం జాతినుద్దేశించి మాట్లాడుతూ చెప్పారు. అంటే, మే 3 వరకు ఈ లాక్‌డౌన్‌ను పొడిగించారు. ప్రస్తుతం దేశంలో కేసులు పెరుగుతోన్న నేపథ్యంలో ఈ నిర్ణయం తీసుకోక తప్పలేదన్నారు. అయితే, ఈ లాక్‌డౌన్ కఠినంగా అమలుచేయడానికి.. ప్రజలు అనవసరంగా రోడ్లపై తిరగకుండా చూసుకోవడానికి పోలీసు శాఖ చాలా కష్టపడుతోంది. హైదరాబాద్ లాంటి మహానగరంలో లాక్‌డౌన్‌ను పకడ్బంధీగా అమలు చేయాలంటే కత్తిమీద సామే. ఈ లాక్‌డౌన్ ఎంతో ముఖ్యమో తెలిసి కూడా చాలా మంది అనవసరంగా రోడ్ల మీదికి వస్తున్నారు. ఇలాంటి వారిని అడ్డుకోవడం కోసం, లాక్‌డౌన్‌ను పకడ్బంధీగా అమలు చేయడం కోసం హైదరాబాద్ పోలీసులు రాత్రింబవళ్లు రోడ్లపై విధులు నిర్వహిస్తున్నారు. పోలీసుల్లో ఆత్మస్థైర్యాన్ని నింపడం కోసం ఉన్నతాధికారులు ఎప్పటికప్పుడు ప్రయత్నిస్తూనే ఉన్నారు. దీనిలో భాగంగా సోమవారం హీరో విజయ్ దేవరకొండతో హైదరాబాద్ పోలీస్ కమీషనర్ అంజనీ కుమార్ వీడియో కాన్ఫరెన్స్ ద్వారా విధుల్లో ఉన్న పోలీసులతో మాట్లాడించారు. పోలీసులను ఉత్తేజపరిచేలా విజయ్ దేవరకొండ వీడియో కాన్ఫరెన్స్‌లో మాట్లాడారు. ‘‘పోలీస్ అన్నలందరికీ నమస్కారం’’ అంటూ రెండు చేతులు పైకెత్తి విజయ్ నమస్తే చెప్పారు. ‘‘అందరూ బాగున్నారా? బాగుంటే థంబ్స్ అప్ చూపించండి’’ అంటూ ఉత్తేజపరిచారు. ‘‘పోలీసు కమీషనర్ పక్కన.. కమీషనర్ ఆఫీసులో కూర్చొని ప్రతి పోలీస్ స్టేషన్‌‌తోనూ వీడియో కాన్ఫరెన్స్‌లో మాట్లాడతానని, అందరూ మాస్కులు వేసుకుని ఉన్నారు.. ఇలాంటి రోజు వస్తుందని అస్సలు అనుకోలేదు. ఇప్పుడు నేను కమీషనర్ ఆఫీసుకు వస్తుంటే ప్రతి షాప్ మూసి ఉంది, రోడ్లు ఖాళీ, ఒకే ఒక్క బ్యాచ్ కనిపిస్తోంది. వాళ్లెవరంటే.. మన పోలీసు వాళ్లు. సిటీ అంతా షట్‌డౌన్ ఉన్నా ప్రతి కిలోమీటర్‌కు బారికేడ్లు, పోలీసు వారు కనిపిస్తున్నారు. మీరంతా 8 నుంచి 12 గంటలు షిఫ్టుల్లో ఉంటున్నారని విన్నాను. మేమంతా ఇళ్లలో కూర్చోడానికి మీ షిఫ్టులు పెరిగాయి. నేను ఇన్ని రోజులు బయటికి రాలేదు.. ఏం మాట్లాడలేదు.. ఇంట్లో ఉండడం వల్లే పెద్ద హెల్ప్ చేస్తున్నానని భావించి స్ట్రిక్ట్‌గా నేను లాక్‌డౌన్ పాటించాను. కానీ, మళ్లీ ఈ లాక్‌డౌన్ పెరగడంతో మీరు చేసే పని ఎంత పెరిగింది, మీరెంత కష్టపడుతున్నారో నాకు కమీషనర్ గారు చెప్పారు. వేరే దేశాల్లో డాక్టర్స్ మీద చాలా ఒత్తిడి ఉంది. పోలీసుల మీద ఇంత ఒత్తిడి లేదు. ఎందుకంటే మనతో పోలిస్తే అక్కడ జనాభా తక్కువ. అలాగే, ప్రజలు తమకు తాము నిర్బంధించుకుంటున్నారు. కొన్ని దేశాల్లో నిబంధనలు చాలా కఠినంగా ఉన్నాయి. కానీ, మన ప్రజల్ని అంత ఇబ్బంది పెట్టకూడదని అంత కఠినమైన నిబంధనలు పెట్టలేదు. మా అమ్మ వంటచేసి, గిన్నెలు తోమి, మా బట్టలు ఉతికేసరికే చాలా అలసిపోతోంది. కానీ, మీరో రోజూ వచ్చి రిపోర్టు చేసి, మళ్లీ వెళ్లి ఇంటి పనులు చూసుకోవడం మామూలు విషయం కాదు. ఈ లాక్‌డౌన్ అయిపోయేంత వరకు పోలీస్ శాఖకు నా పూర్తి సహకారం ఉంటుంది. కమీషనర్ గారు ఎప్పుడు నన్ను పిలిచినా, నా నుంచి ఏమైనా చెప్పమని అడిగినా 100 శాతం నేను అందుబాటులో ఉంటాను. ఎందుకంటే, ఒక పౌరుడిగా మన పోలీస్ ఫోర్స్‌కు అండగా నిలబడాల్సిన బాధ్యత నాపై ఉంది’’ అని విజయ్ అన్నారు. అలాగే, వీడియో కాన్ఫరెన్స్‌లో ఉన్న పోలీసు అధికారులు విజయ్‌కు ధన్యవాదాలు తెలిపారు.

from https://ift.tt/2RAPHnI