‘సైరా’ ఈవెంట్: బన్నీని రామ్ చరణ్ పిలవలేదా?.. ఇందులో నిజమెంత?

మెగాస్టార్ చిరంజీవి హీరోగా నటించిన ప్రతిష్టాత్మక చిత్రం ‘సైరా నరసింహారెడ్డి’ ప్రీ రిలీజ్ వేడుక ఆదివారం రాత్రి హైదరాబాద్‌లోని ఎల్బీ స్టేడియంలో జరిగిన విషయం తెలిసిందే. ఈ వేడుకకు పవర్ స్టార్ పవన్ కళ్యాణ్ ముఖ్య అతిథిగా విచ్చేశారు. మిగిలిన మెగా హీరోలంతా తరలివచ్చారు. అయితే, మెగా కాంపౌండ్‌కే చెందిన స్టైలిష్ స్టార్ ఈ వేడుకకు రాకపోవడం చర్చనీయాంశమైంది. బన్నీ గైర్హాజరుపై పలు సినిమా వెబ్‌సైట్లలో రకరకాల వార్తలు రాశారు. సోషల్ మీడియాలో సైతం కొంతమంది చిరంజీవి ఫ్యాన్స్ బన్నీకి వ్యతిరేకంగా పోస్టులు పెట్టారు. వాస్తవానికి ఈ విషయంలో మెగా ఫ్యాన్స్ తీవ్ర అసహనంతో ఉన్నారు. ప్రస్తుతం రాజకీయాల్లో బిజీగా ఉన్న పవన్ కళ్యాణ్ తన పనులను పక్కన బెట్టి అన్నయ్య కోసం ఈ ఈవెంట్‌కు వచ్చారు. ‘ప్రతిరోజూ పండగే’ షూటింగ్‌లో బిజీగా ఉన్న సాయిధరమ్ తేజ్.. రాజమండ్రి నుంచి హైదరాబాద్ వచ్చి మరీ పాల్గొన్నారు. ఇక కాలి గాయంతో బాధపడుతోన్న వరుణ్ తేజ్.. తన డాడీ కోసం ఈవెంట్‌కు హాజరయ్యారు. ఇక అన్నయ్య తేజూతో పాటు వైష్ణవ్ తేజ్ కూడా వచ్చారు. ఇలా ఎవరికి వారి వ్యక్తిగత కారణాలు ఉన్నా మెగా హీరోలంతా చిరంజీవి కోసం ప్రీ రిలీజ్ ఈవెంట్‌కు వచ్చారు. కానీ, హైదరాబాద్‌లో ఉండి కూడా అల్లు అర్జున్ ఈ వేడుకకు రాకపోవడం వల్లే ఇంత రచ్చ జరిగింది. బన్నీని అంతా తప్పుబట్టడం మొదలుపెట్టారు. అయితే, ఇండస్ట్రీలోని మరో వర్గం బన్నీకి అనుకూలంగా ప్రధాన కారణం ఒకదానిని చెబుతోంది. పవన్ కళ్యాణ్‌ను చీఫ్ గెస్ట్‌గా రామ్ చరణ్ ప్రత్యేకంగా ఆహ్వానించారు. అయితే, బన్నీని మాత్రం ఈవెంట్‌కు రావాలని కనీసం రామ్ చరణ్ పిలవలేదట. దీంతో అల్లు అర్జున్ అహం దెబ్బతిన్నదని, ఆయన ఈవెంట్‌కు హాజరుకాలేదని ఒక వాదన ఇండస్ట్రీలో వినిపిస్తోంది. అయితే, ఇది పచ్చి అబద్ధమని అంటున్నారు మరికొందరు. అల్లు అర్జున్‌కు ప్రత్యేక ఆహ్వానం పంపకపోయినప్పటికీ మిగిలిన మెగా హీరోలను పిలిచినట్టుగానే బన్నీని రామ్ చరణ్ పిలిచారని సమాచారం. అయితే, తాను ‘అల... వైకుంఠపురములో...’ షూటింగ్‌తో చాలా బిజీగా ఉన్నానని.. షెడ్యూల్ క్యాన్సిల్ చేసుకుని ఈవెంట్‌కు రాలేనని రామ్ చరణ్‌కు అల్లు అర్జున్ చెప్పారట. అందుకే హైదరాబాద్‌లోనే ఉన్నప్పటికీ షూటింగ్‌తో బిజీగా ఉన్న అల్లు అర్జున్.. ‘సైరా’ ఈవెంట్‌కు హాజరుకాలేకపోయారు అనేది ప్రస్తుతం బలంగా వినిపిస్తోన్న వాదన. ఏదేమైనా.. బన్నీ తీసుకున్న నిర్ణయం విమర్శలకు తావిచ్చింది. ఏదోలా ఖాళీ చూసుకుని ‘సైరా’ ఈవెంట్‌కు వచ్చుంటే సరిపోయేది. బన్నీ చేసిన ఇంకో పొరపాటు ఏమిటంటే.. ‘సైరా’ ట్రైలర్ గురించి ట్వీట్ చేయకపోవడం. ప్రస్తుతం చిరంజీవి ఫ్యాన్స్ దీనిని కూడా ఎత్తిచూపిస్తున్నారు. ఒకవేళ ఖాళీ దొరకక ‘సైరా’ ఈవెంట్‌కు రాలేకపోయింది నిజమే అయితే.. మరి ‘సైరా’ ట్రైలర్‌ గురించి ఎందుకు స్పందించలేదు అని గట్టిగా ప్రశ్నిస్తున్నారు. చూద్దాం ఈ రచ్చ ఎక్కడి వరకు వెళ్లి ఆగుతుందో..!

from https://ift.tt/2mxF4pb