‘అపరిచితుడు’ హిందీ రీమేక్ వివాదంలో కొత్త ట్విస్ట్.. ఆ సినిమాపై మీకేం హక్కుంది.. నిర్మాతకు షాక్ ఇచ్చిన శంకర్

స్టార్ డైరెక్టర్ శంకర్.. తన సూపర్‌హిట్ చిత్రం ‘అపరిచితుడు(అన్నియన్)’ని హిందీలో రీమేక్ చేస్తున్నట్లు ప్రకటించడంతో వివాదం రాజేసుకున్న విషయం తెలిసిందే. ఈ చిత్రంపై పూర్తి హక్కులు తనవేనని.. తమ అనుమతి లేకుండా సినిమాను రీమేక్ చేస్తే.. చట్టరీత్య చర్యలు తప్పవంటూ.. చిత్ర నిర్మాత, ఆస్కార్ ఫిలిమ్స్ అధినేత శంకర్‌కు లేఖ రాశారు. అయితే ఈ లేఖపై తాజాగా స్పందించారు. ఈ సినిమా కథ, స్క్రీన్‌ప్లే, పాత్రలు ఇలా ప్రతీ అంశం తాను రాసుకున్నదేనని.. కాబట్టి సినిమాపై పూర్తి హక్కులు తనవేనని శంకర్ ఓ లేఖ ద్వారా వెల్లడించారు. ఈ సినిమాను ఎలా అయినా రీమేక్ చేసుకొనే పూర్తి అధికారం తనకు ఉన్నదని ఆయన స్పష్టం చేశారు. వి.రవిచంద్రన్‌ను ఉద్ధేశించి లేఖ రాసిన శంకర్.. ‘‘ సినిమా హక్కులు మీవని చెప్పడం నన్ను ఆశ్చర్యానికి గురి చేసింది. 2005లో విడుదలైన ఈ సినిమాలో పని చేసిన ప్రతీ ఒక్కరికీ కథ, స్క్రీప్ట్ నాకు చెందినవే అని పూర్తి అవగాహన ఉంది. సినిమా ‘స్టోరీ, స్క్రీన్‌ప్లే, దర్శకత్వం బై శంకర్’ అనే ట్యాగ్‌లైన్‌తో విడుదల అయింది. ఈ సినిమా స్క్రీప్ట్, స్క్రీన్‌ప్లే రాసేందుకు నేను ఎవరిని పనిలో పెట్టుకోలేదు. కాబట్టి దీనిపై పూర్తి హక్కులు నావే. ఇక మీరు సుజాతా పేరును ప్రస్తావించడం నన్ను సర్‌ప్రైజ్ చేసింది. ఆయన్ని నేనే సినిమాకు డైలాగ్స్ రాసేందుకు నియమించాను. అంతేకానీ, కథ, స్క్రీన్‌ప్లే, పాత్రల విషయంలో ఆయనకు ఎలాంటి సంబంధం లేదు. కేవలం డైలాగ్స్ వరకే ఆయనకి ఈ సినిమాతో సంబంధం ఉంది. ఈ సినిమాను నేను ఎలా అయినా రీమేక్ చేసుకోవచ్చు. నిజానికి మీకు, మీ సంస్థకే సినిమాపై ఎలాంటి హక్కులు లేవు.’’ అని శంకర్ లేఖలో స్పష్టం చేశారు. ఇక ఒక ప్రొడ్యూసర్‌గా వి.రవిచంద్రన్‌కి ఈ సినిమాతోనే గుర్తింపు వచ్చిందని శంకర్ గుర్తు చేశారు. దాన్ని ఆసరాగా చేసుకొని తన రాబోయే ప్రాజెక్టుల ద్వారా గుర్తింపు సంపాదించుకోవాలని ప్రయత్నం చేయడం దురదృష్టకరమని ఆయన మండిపడ్డారు. ‘‘ఈ వివరణ చూసిన తర్వాత అయినా.. మీకు బుద్ధి వచ్చి.. భవిష్యత్తులో ఇలా నిరాధారమైన దావాలు చేయరని ఆశిస్తున్నాను. ఒక దర్శకుడిగా, రచయితగా నా భవిష్యత్తుపై , నా తదుపరి ప్రాజెక్టులను కించపరచాలని జరుగుతున్న ఇలాంటి దురదృష్టకర, అన్యాయమైన ఆరోపణలకు ఖండిస్తూ ఎటువంటి పక్షపాతం లేకుండా మీకు సమాధానం ఇస్తున్నాను’’ అని శంకర్ లేఖలో తెలిపారు.

from https://ift.tt/2Q8dmOT