ప్రభాస్ ‘ఆదిపురుష్’: రావణుడిగా బాలీవుడ్ హీరో

రెబల్ స్టార్ హీరోగా ‘ఆదిపురుష్’ అనే భారీ చిత్రాన్ని నిన్న (ఆగస్టు 18న) ప్రకటించిన విషయం తెలిసిందే. ‘చెడు మీద మంచి సాధించిన విజయం’ అనే కాన్సెప్ట్‌తో రామాయణం ఆధారంగా ఈ సినిమాను తెరకెక్కిస్తున్నారు. నిన్న విడుదల చేసిన టైటిల్ పోస్టర్ ప్రభాస్ అభిమానుతో పాటు సినీ ప్రేక్షకులను విశేషంగా ఆకట్టుకుంది. ఈ పాన్ ఇండియా మూవీని టి-సిరీస్ సంస్థ భారీ బడ్జెట్‌తో నిర్మించనుంది. ఓం రౌత్ దర్శకత్వం వహించనున్న ఈ ప్రతిష్టాత్మక చిత్రంలో ప్రభాస్ రాముడి పాత్ర పోషిస్తోన్న సంగతి తెలిసిందే. అయితే, ప్రభాస్‌కు విలన్‌గా అంటే రావణాసురిడిగా ప్రముఖ బాలీవుడ్ నటుడు నటించనున్నారని సమాచారం. ప్రస్తుతం బాలీవుడ్‌‌లో జరుగుతోన్న ప్రచారం ఆధారంగా ప్రముఖ నటుడు సైఫ్ అలీ ఖాన్ రావణుడి పాత్రలో కనిపించనున్నారట. దర్శకుడు ఓం రౌత్ తొలి చిత్రం ‘తానాజీ’లో సైఫ్ అలీ ఖాన్ నటించారు. అజయ్ దేవగణ్ హీరోగా వచ్చిన ఈ చిత్రంలో సైఫ్ అలీ ఖాన్ కీలకమైన ఉదయభాన్ సింగ్ రాథోడ్ పాత్రలో కనిపించారు. ఔరంగజేబు సేనానిగా చాలా హుందాగా, భయంకరంగా సైఫ్ అలీ ఖాన్ కనిపించారు. అందుకే, రావణుడి పాత్రకు ఆయనైతే న్యాయం చేయగలరని ఓం రౌత్ భావించారట. ఆయన అడగగానే సైఫ్ కూడా అంగీకరించారని అంటున్నారు. Also Read: మొత్తం మీద ప్రభాస్‌కు సైఫ్ అలీ ఖాన్ విలన్ అనే వార్త ఆసక్తికరంగా మారింది. అయితే, దీనిపై అధికారిక ప్రకటన రావాల్సి ఉంది. త్వరలోనే ఈ చిత్రంలో నటించే నటీనటుల వివరాలు వెల్లడిస్తారని.. వారిలో సైఫ్ అలీ ఖాన్ పేరు కూడా ఉంటుందని అంటున్నారు. బాలీవుడ్ స్టార్స్‌తో పాటు దక్షిణాదికి చెందిన ప్రముఖ నటులు కూడా ఈ చిత్రంలో ముఖ్య పాత్రలు పోషించనున్నారని సమాచారం. కాగా, ఈ చిత్రం భారతీయ సినిమాలోనే భారీ బడ్జెట్ మూవీగా నిర్మితంకానుంది. టి-సిరీస్ సంస్థ ఏకంగా రూ.1000 కోట్లు ఈ సినిమా కోసం వెచ్చిస్తోందని సమాచారం.

from https://ift.tt/3g6gstC