అవన్నీ పుకార్లు.. నమ్మొద్దు: సాయి తేజ్ నిర్మాత‌లు

గ‌త ఏడాది ‘చిత్రల‌హ‌రి’, ‘ప్రతిరోజూ పండ‌గే’ చిత్రాల‌తో వ‌రుస విజ‌యాల‌ను సొంతం చేసుకున్న సుప్రీమ్ హీరో సాయి తేజ్ ఈ ఏడాది కూడా వరుసపెట్టి సినిమాలు చేస్తున్నారు. ‘సోలో బ్రతుకే సో బెటర్’ సినిమా షూటింగ్ ఇప్పటికే ప్రారంభమైంది. అయితే, ఇటీవల ఆయన మరో సినిమాను ప్రారంభించారు. ‘ప్రస్థానం’ వంటి డిఫరెంట్ మూవీని తెర‌కెక్కించిన ద‌ర్శకుడు దేవా క‌ట్ట ద‌ర్శక‌త్వంలో ఈ సినిమా రూపొందుతోంది. ఇటీవ‌ల లాంఛ‌నంగా ప్రారంభ‌మైన ఈ చిత్రాన్ని జె.బి.ఎంట‌ర్‌టైన్‌మెంట్స్ బ్యాన‌ర్‌పై జె.భగవాన్, జె.పుల్లారావు నిర్మిస్తున్నారు. ఈ సినిమాలో న‌టీన‌టుల‌పై వ‌స్తున్న పుకార్లపై నిర్మాత‌లు స్పందించారు. నిర్మాత‌లు జె.భగవాన్, జె.పుల్లారావు మాట్లాడుతూ.. ‘‘సాయితేజ్, దేవా కట్ట కాంబినేషన్‌లో మా బ్యాన‌ర్‌లో చేస్తున్న సినిమా రెగ్యుల‌ర్ షూటింగ్ ఈ నెల 20 నుండి ప్రారంభం కావాల్సింది. కానీ కోవిడ్ 19 కార‌ణంగా ప్రపంచంలోని ప్రజ‌లంద‌రూ ఇబ్బంది ప‌డుతున్నారు. మ‌న దేశంలో లాక్‌డౌన్ కొన‌సాగుతుంది. ఇలాంటి ప‌రిస్థితుల్లో షూటింగ్ చేయ‌లేం. కాబ‌ట్టి క‌రోనా వైర‌స్ ప్రభావం త‌గ్గిన త‌ర్వాత సినిమా రెగ్యుల‌ర్ షూటింగ్ వివ‌రాల‌ను తెలియ‌జేస్తాం. అలాగే సినిమాలో న‌టించ‌బోయే న‌టీన‌టుల గురించి కూడా సోష‌ల్ మీడియాలో ప‌లు ర‌కాలైన వార్తలు విన‌ప‌డుతున్నాయి. అవ‌న్నీ అవాస్తవాలు. పుకార్లను న‌మ్మవ‌ద్దని మ‌న‌వి. సినిమాకు సంబంధించిన విష‌యాల‌ను మేమే అధికారికంగా తెలియ‌జేస్తాం’’ అని అన్నారు. Also Read: కాగా, ఈ సినిమాను ఈ ఏడాది మార్చి 12న ప్రారంభించారు. ప్రారంభోత్సవానికి పవర్ స్టార్ పవన్ కళ్యాణ్ ముఖ్య అతిథిగా విచ్చేసి ముహూర్తపు సన్నివేశానికి క్లాప్ కొట్టారు. అలాగే.. ప్రముఖ నిర్మాతలు అల్లు అర‌వింద్‌, బీవీఎస్ఎన్ ప్రసాద్‌, ఎ.ఎం.రత్నం, ప్రముఖ ద‌ర్శకుడు వంశీ పైడిప‌ల్లి అతిథులుగా పాల్గొన్నారు. ఈ సినిమాలో జగపతిబాబు కీలక పాత్ర పోషిస్తున్నారు. ఈ సినిమాకు మణిశర్మ సంగీతం సమకూరుస్తుండగా.. శ్యామ్ దత్ సినిమాటోగ్రఫీ అందిస్తున్నారు. ఇది సాయి తేజ్‌కు 14వ సినిమా.

from https://ift.tt/2xd0CND