చిరంజీవి సాయం.. అభిమాని నాగలక్ష్మి ఆపరేషన్ విజయవంతం

గుండె జబ్బుతో బాధపడుతోన్న తన మహిళా అభిమానికి మెగాస్టార్ చిరంజీవి హైదరాబాద్‌లో ఆపరేషన్ చేయిస్తున్నారని ఇప్పటికే వార్తలు వచ్చాయి. గుంటూరుకు చెందిన రాజనాల వెంకట నాగలక్ష్మి.. చిరంజీవి అంజనా మహిళా సేవా సంస్థకు అధ్యక్షురాలిగా ఉన్నారు. ఆమె కొంతకాలంగా గుండె జబ్బుతో బాధపడుతున్నారు. ఈ మధ్య ఆమె ఆరోగ్యం బాగా క్షీణించింది. ఈ విషయాన్ని అభిమానులు చిరంజీవి దృష్టికి తీసుకెళ్లారు. వెంటనే స్పందించిన చిరంజీవి హైదరాబాద్‌లోని స్టార్ హాస్పిటల్‌లో ఆమెకు ఆపరేషన్‌కు జరిపించేందుకు ఏర్పాట్లు చేశారు. ఈ లాక్‌డౌన్ పీరియడ్‌లో పోలీసుల నుంచి ప్రత్యేక అనుమతులు తీసుకొని గుంటూరు నుంచి ఆమెను హైదరాబాద్ తీసుకొచ్చారు. తాజాగా ఆమెకు ఆపరేషన్ చేశారు. నాగలక్ష్మి గుండె శస్త్రచికిత్స విజయవంతం అయినట్టు అఖిల భారత చిరంజీవి యువత అధ్యక్షుడు లవణం స్వామినాయుడు స్పష్టం చేశారు. ఈ మేరకు మీడియాకు ఒక ప్రకటన విడుదల చేశారు. ‘‘పద్మభూషణ్ మెగాస్టార్ కొణిదెల చిరంజీవి గారి సహాయంతో రాజనాల నాగలక్ష్మి గారి ఆపరేషన్ విజయవంతంగా జరిగింది. స్టార్ హాస్పిట‌ల్ చైర్మెన్, మేనేజింగ్ డైరెక్టర్ డాక్టర్ ఎమ్. గోపీచంద్ గారి ఆధ్వర్యంలో సుమారు 3.30 నిమిషాల పాటు వైద్యులు ఆమెకు ఆపరేషన్‌ను విజయవంతంగా పూర్తిచేశారు. ఆపరేషన్ గురించి చిరంజీవి గారు ఎప్పటికప్పుడు సమాచారం తెలుసుకుంటూనే వున్నారు. ఆపరేషన్ పూర్తి అవ్వగానే మొదటి ఫోన్ డాక్టర్ గోపీచంద్ గారు చిరంజీవి గారికి చేశారు. చిరంజీవి గారు చాలా సంతోషంతో ఆప‌రేష‌న్ విజయవంతం అయ్యిందని మా అందరికీ తెలియజేసారు. చిరంజీవి గారు నిండు నూరేళ్లు సుఖసంతోషాలతో జీవించాలని ముక్కోటి దేవతలను ప్రార్థిద్దాం’’ అని స్వామినాయుడు తన ప్రకటనలో పేర్కొన్నారు. Also Read: కాగా, ఆపరేషన్ విజయవంతం అవడంపై చిరంజీవి కూడా స్పందించారని స్వామినాయుడు చెప్పారు. ‘‘డాక్టర్ గోపీచంద్ గారికి.. వాళ్ల బృందానికి ధ‌న్యవాదాలు. అలాగే, ఈ విష‌యాన్ని స‌మ‌యానికి నా దృష్టికి తీసుకొచ్చిన స్వామి నాయుడికి, హైద‌రాబాద్ వ‌ర‌కూ రావ‌టానికి ఏర్పాట్లు చేసిన బి. దిలీప్ గారికి, ఇంతదూరం ప్రయాణించ‌డానికి అనుమ‌తిచ్చిన రెండు రాష్ట్రాల పోలీసు అధికారుల‌కి, ఇత‌ర సిబ్బందికి ప్రత్యేకంగా ధ‌న్యవాదాలు తెలుపుతున్నాని’’ అని చిరంజీవి వెల్లడించారు.

from https://ift.tt/3cltUbN