మిమ్మల్ని కలుద్దాం అనుకున్నా.. దేవుడు మరో స్క్రిప్ట్ రాశాడు: మంచు మనోజ్

అన్నీ మనం అనుకున్నట్టే ఎప్పుడూ జరగవు. మనమొకటి తలిస్తే విధి మరో విధంగా ఆలోచిస్తుంది. అసలు కరోనా అనే భయంకరమైన వైరస్ ఒకటి ఉంటుందని, అది ప్రపంచాన్ని గడగడలాడిస్తుందని మనం ఎప్పుడూ ఊహించి ఉండం. చైనాలో ఈ వైరస్ వచ్చింది అని తెలిసినప్పుడు కూడా అది మనదేశానికి వస్తుందని, మనల్ని ఇలా ఇళ్లకే పరిమితం చేస్తుందని అస్సలు అనుకోని ఉండం. కానీ, ఏం చేస్తాం. ఇప్పుడు ఉండాల్సి వస్తోంది. ప్రకృతికి నష్టం చేకూరుస్తూ మనం చేసిన తప్పులే ఇప్పుడు మనల్ని వేధిస్తున్నాయి. ప్రపంచాన్ని పీడించుకు తింటోన్న కరోనా మహమ్మారిని మన దేశం నుంచి తరిమికొట్టే ప్రయత్నంలో 21 రోజులపాటు లాక్‌డౌన్ విధించారు. నిజానికి ఇది మనమంచికే. మనల్ని, మన పిల్లల్ని, తల్లిదండ్రులని, మన చుట్టూ ఉండేవాళ్లని కాపడటానికే. కానీ, ఏం చేస్తాం.. ఇన్నాళ్లు స్వేచ్ఛా పక్షుల్లా రోడ్లపై తిరిగిన ప్రాణాలు. ఒక్కసారిగా ఇళ్లలో కూర్చోమంటే కష్టం కదా. కానీ, తప్పదు. సామాన్య ప్రజల నుంచి సెలబ్రిటీల వరకు అందరూ ఇళ్లకే పరిమితం అయ్యారు. ప్రజల్లో అసహనాన్ని పారదోలడానికి, కరోనాపై వారిలో అవగాహన కల్పించడానికి ప్రభుత్వాలతో పాటు సెలబ్రిటీలు కూడా ముందుకొస్తున్నారు. సోషల్ మీడియా ద్వారా ప్రజల్లో చైతన్యం నింపుతున్నారు. వారిలోనూ కరోనాపై అసహనం ఉన్నా దాన్ని బయటికి కనిపించనివ్వకుండా మనకు జాగ్రత్తలు చెబుతున్నారు. Also Read: ఇప్పటికే చాలా మంది సినిమా స్టార్లు కరోనాపై అవగాహన కల్పిస్తూ వీడియోలు చేశారు. ఇప్పుడు మంచువారబ్బాయి మనోజ్ వంతు వచ్చింది. తన మేనకోడలితో కలిసి ఒక వీడియో సాంగ్‌తో మన ముందుకు రాబోతున్నారు. మన కోసం వారి ప్రాణాలను పణంగా పెట్టి పనిచేస్తోన్న డాక్టర్లు, పోలీసులు, పారిశుద్ధ్య కార్మికులకు ఈ పాటను అంకితమివ్వనున్నట్టు మనోజ్ తెలిపారు. ఈ విషయాన్ని ఆయనే స్వయంగా ట్విట్టర్ ద్వారా వెల్లడించారు. అయితే, ఈ కరోనా వైరస్ కారణంగా తాను ఏం కోల్పోయానో చెబుతూ కాస్త అసహనం వ్యక్తం చేశారు. ‘‘మూడు సంవత్సరాల విరామం తర్వాత మంచి సినిమాతో మిమ్మల్ని పలుకరిద్దాం అనుకున్నాను. మనమంతా ఒక స్క్రిప్ట్ రాసుకుంటే దేవుడు మరొక స్క్రిప్ట్ రాస్తాడు. ‘యాక్షన్’ అన్న పదం వినే అదృష్టాన్ని ఇంకొన్ని రోజులు దూరం జరిపాడు. వచ్చే వారం డాక్టర్లకు, పోలీసులకు, ఆర్మీకి, పారిశుధ్య కార్మికులకు, ముఖ్యంగా వాళ్ళు చేసే త్యాగానికి ఒక పాట అంకితం చేస్తున్నాను. అచ్చు మ్యూజిక్ డైరెక్షన్లో ‘అంతా బాగుంటాం రా’ అని నేను, నా మేనకొడలు విద్యా నిర్వాణ కలిసి పాడి, పాట రూపంలో ఇస్తున్న చిన్న భరోసా ఇది.. ఇప్పటికే చాలా వాటికోసం ఎదురు చూస్తున్నారు. కష్టం అయినా వచ్చే వారం వరకూ అగండి’’ అని మనోజ్ తన ట్వీట్‌లో పేర్కొన్నారు.

from https://ift.tt/3a4Tqk1