తూర్పుగోదావరి జూనియర్ ఆర్టిస్టులకు అండగా నటుడు గౌతంరాజు

క‌రోనా వైరస్‌ను నిర్మూలించడంలో భాగంగా లాక్‌డౌన్ అమలవుతోన్న వేళ సినీకార్మికులు తీవ్ర ఇబ్బందుల‌కు గుర‌వుతున్న సంగ‌తి తెలిసిందే. మెగాస్టార్ చిరంజీవి ఆధ్వర్యంలో ఏర్పాటైన కరోనా క్రైసిస్ ఛారిటీ ద్వారా పేద కళాకారులకు, రోజువారీ వేతనానికి పనిచేసే సినీ కార్మికులకు సేవ‌లందిస్తుండ‌గా.. కొంత మంది నటీనటులు స్వయంగా తమ వంతు సాయం అందిస్తున్నారు. వీరిలో సీనియర్ నటుడు గౌతంరాజు కూడా ఉన్నారు. గౌతం రాజు త‌న‌వంతుగా 200 మందికి సేవ‌లందించ‌డం హ‌ర్షణీయం. తూర్పుగోదావరి జిల్లాలో ఉన్న జూనియర్ ఆర్టిస్టులకు ఆర్థికసాయం అందిస్తున్నారు. ఈ విషయాలను గౌతంరాజు స్వయంగా వెల్లడించారు. ‘‘చాలా షూటింగులు తూర్పుగోదావరి జిల్లాలో జ‌రుగుతాయి. రాజ‌మండ్రి, రామచంద్రాపురం, యానాం, కాకినాడ, మండ‌పేట‌, పిఠాపురం, సామర్లకోటలో జ‌రుగుతుంటాయి. క‌రోనా మ‌హ‌మ్మారి వ‌ల్ల అక్కడ జూనియర్ ఆర్టిస్టుల‌కు ప‌నుల్లేవు. షూటింగ్‌లు లేక‌పోతే పొలం ప‌నులు చేసేవారు. కానీ, ఇప్పుడు వాళ్ల పరిస్థితి చాలా హీనంగా ఉంది. నాకు సాయం చేసేంత మనసు ఉంది కానీ మనీ లేదు. ఏం చేయాలి అని ఆలోచిస్తుంటే మా అబ్బాయి నా పాకెట్ మనీ కొంత ఉంది డాడీ అని ఒక సలహా చెప్పాడు. అది నాకు బాగా నచ్చి వెంటనే మూవీ ఆర్టిస్ట్ అసోసియేషన్ ప్రెసిడెంట్, నా మిత్రుడు నరేష్ గారికి చెప్పాను. ఆయన కొంత సాయం చేశారు. అలాగే, యూఎస్‌లోని అట్లాంటాలో నా మిత్రుడు శేష‌గిరి, న్యూజెర్సీలో ముర‌ళి, బిగ్ బ‌జార్ సూర్య, చంద్రకాంత్ రెడ్డి, భీమ‌వ‌రంలో నా త‌మ్ముడు మ‌హేష్‌, కాకినాడ కిర‌ణ్ కుమార్ (నిర్మాత‌) త‌మ‌వంతు సాయం చేశారు. కొండ‌య్య అనే జూనియర్ ఆర్టిస్ట్ కమ్ స‌ప్లయ‌ర్ సాయంతో ఒక జాబితా తయారు చేశాం. దాదాపు 200 మంది వచ్చారు. నా శిష్యులు క‌ల్కి, గంగ, మ‌ల్లేష్ గౌడ్ త‌దిత‌రులతో కలిసి రామ‌చంద్రాపురం నుంచి ఆర్థిక సాయం చేయడం మొదలుపెట్టాం. వంద మందికి ఇప్పటికే సాయ‌మందించాం. ఇంకో వంద మందికి కూడా ఆర్థిక సహాయం అందజేస్తాం. ప్రస్తుతం కర్ఫ్యూ ఉంది కాబట్టి ఉదయం 6.30 నుంచి 9 గంటల వరకు మాత్రమే ఆయా ప్రాంతాలకు వెళ్లి సహాయం చేయడం కుదురుతోంది. ఈ మంచి పని కోసం నాకు సహాయం చేసిన నరేష్ గారికి, నా మిత్రులకు, ఈ స‌ల‌హా ఇచ్చిన మా అబ్బాయికి థ్యాంక్స్ చెబుతున్నాను. అలాగే అందరికీ నా విన్నపం.. మ‌న ప్రధాని, ఇరు రాష్ట్రాల ముఖ్యమంత్రులు మ‌న ప్రాణాలు కాపాడేందుకు కొన్ని నిబంధ‌న‌లు పెట్టారు. వాటిని ఉల్లంఘించి బయటికి వెళ్లడం మనకే నష్టం. నెలాఖ‌రు వ‌ర‌కూ ఎవరూ బయటికి వెళ్లకండి. అలాగే, మనకోసం సేవ‌లు అందిస్తోన్న పోలీసు శాఖకి, డాక్టర్లకు అంద‌రికీ సహకరించండి’’ అని తెలిపారు.

from https://ift.tt/2K6Hh3l