హీరో నిఖిల్ పెళ్లి వాయిదా.. తప్పలేదు!

తన పెళ్లి వాయిదా పడే ప్రసక్తే లేదన్నారు హీరో నిఖిల్ సిద్ధార్థ. ఆరు నూరయినా అనుకున్న తేదీకి తన పెళ్లి జరుగుతుందని కుండ బద్దలు కొట్టారు. కానీ, పరిస్థితులు అన్నిసార్లు మన చేతుల్లో ఉండవు కదా. ప్రస్తుతం పరిస్థితులు కరోనా మహమ్మారి ఆధీనంలో ఉన్నాయి. అందుకే, తన వివాహాన్ని వాయిదా వేసుకోక తప్పలేదు నిఖిల్‌కి. పశ్చిమ గోదావరి జిల్లా భీమవరానికి చెందిన డాక్టర్ పల్లవి వర్మతో నిఖిల్ పెళ్లి నిశ్చమైన సంగతి తెలిసిందే. వీరి పెళ్లి ఏప్రిల్ 16న హైదరాబాద్‌లో జరగాల్సి ఉంది. అయితే, ప్రస్తుత పరిస్థితుల్లో తమ పెళ్లి జరగడం కష్టమని, అందుకే వాయిదా వేస్తున్నానని తాజాగా నిఖిల్ స్పష్టం చేశారు. త్వరలోనే కొత్త తేదీని ప్రకటిస్తానని చెప్పారు. ఇదిలా ఉంటే, కరోనా వైరస్‌ నిర్మూలన కోసం పోరాడుతోన్న వైద్య సిబ్బందికి, పోలీస్ సిబ్బందికి నిఖిల్ అండగా నిలుస్తున్నారు. వారి కోసం ఖరీదైన పర్సనల్ ప్రొటక్షన్ కిట్స్‌ను అందిస్తున్నారు. ఇప్పటికే గాంధీ హాస్పిటల్ స్టాఫ్‌కు భారీగా ఎన్95 రెస్సిరేటర్లు, గ్లోవ్స్, ప్రొటక్షన్ గ్లాసెస్, శానిటైజర్లు, ఫేస్ మాస్క్‌లు అందజేశారు. అలాగే, రోడ్లపై విధులు నిర్వహిస్తోన్న పోలీసు సిబ్బందికి కొన్నివేల శానిటైజర్లు సరఫరా చేశారు. గురువారం తెలంగాణ జూనియర్ డాక్టర్స్ అసోసియేషన్‌కు వందలాదిగా ఎన్95 రెస్పిరేటర్స్‌ను స్వయంగా అందజేశారు. అలాగే, వైజాగ్‌లోని విమ్స్‌ సిబ్బందికి హజ్మాత్ సూట్స్, ప్రొటెక్టివ్ గేర్ (పీపీఈ) అందజేయనున్నట్టు చెప్పారు. Also Read: ఇక నిఖిల్ సినిమాల విషయానికి వస్తే.. ఆయన ప్రస్తుతం ‘కార్తికేయ 2’, ‘18 పేజస్’ చిత్రాలు చేస్తున్నారు. చందు మొండేటి దర్శకత్వంలో వచ్చిన సూపర్ హిట్ మూవీ ‘కార్తికేయ’కు సీక్వెల్‌గా ‘కార్తికేయ 2’ తెరకెక్కుతోంది. అల్లు అరవింద్ సమర్పణలో సుకుమార్ రైటింగ్స్, జీఏ2 పిక్చర్స్ బ్యానర్లపై బన్నీ వాస్ నిర్మిస్తోన్న చిత్రం ‘18 పేజస్’. సుకుమార్ కథ, స్క్రీన్‌ప్లే అందిస్తున్నారు. పల్నాటి సూర్య ప్రతాప్ దర్శకుడు. గోపీ సుందర్ సంగీతం సమకూరుస్తున్నారు. ప్రస్తుతం ఈ రెండు సినిమాలతో నిఖిల్ బిజీగా ఉన్నారు. కాకపోతే, లాక్‌డౌన్ కారణంగా ప్రస్తుతం షూటింగ్స్ ఆగిపోయిన సంగతి తెలిసిందే.

from https://ift.tt/3dQI85F