ఆ మ్యాజిక్ ఘనత మీది సార్.. పువ్వుల్లో పెట్టి చూసుకుంటారు: చిరంజీవి

మెగాస్టార్ చిరంజీవి 90ల్లో ఎన్నో బ్లాక్ బస్టర్ సినిమాలను తెలుగు ప్రేక్షకులకు అందించారు. వాటిలో ‘ఘరానామొగుడు’ ఒకటి. దర్శకేంద్రుడు కె.రాఘవేంద్రరావు దర్శకత్వం వహించిన ఈ చిత్రం 1992 ఏప్రిల్ 9న విడుదలైంది. అప్పట్లోనే రూ.10 కోట్లకు పైగా షేర్ వసూలు చేసి సెన్సేషన్ క్రియేట్ చేసింది. గురువారం నాటికి ఈ సినిమా విడుదలై 28 సంవత్సరాలు పూర్తయిన సందర్భంగా రాఘవేంద్రరావు ఆ జ్ఞాపకాలను గుర్తుచేసుకుంటూ ట్వీట్ చేశారు. ‘‘కాలం పరిగెడుతోంది.. కానీ, నా బాబాయ్‌(చిరంజీవి)తో ఈ సినిమా కోసం చేసిన షూటింగ్ మెమరీస్ మాత్రం ఇప్పటికీ నా మైండ్‌లో ఫ్రెష్‌గా ఉన్నాయి. ఇది మెగా స్పెషల్ ఫిలిం. మైలురాయి లాంటి చిత్రం. ‘ఘరానామొగుడు’ విడుదలై 28 ఏళ్లు పూర్తయింది. నా నిర్మాత దివంగత దేవీ వరప్రసాద్, చిత్ర బృందానికి కృతజ్ఞతలు’’ అని రాఘవేంద్రరావు తన ట్వీట్‌లో పేర్కొన్నారు. షూటింగ్ సమయంలో సెట్స్‌లో చిరంజీవితో ఉన్న ఫొటోను, ‘ఘరానామొగుడు’ పోస్టర్‌ను ట్వీట్‌లో పొందుపరిచారు. అయితే, రాఘవేంద్రరావు ట్వీట్‌కు చిరంజీవి స్పందించారు. ‘‘ఈ మ్యాజిక్ ఘనత మీది సార్. ఈ చిత్రం సృష్టించిన రికార్డ్స్ కంటే, మీతో పనిచేసిన ప్రతి రోజూ ఓ మంచి జ్ఞాపకం. నటీనటులను పువ్వుల్లో (ఒక్కోసారి పళ్లలో) పెట్టి చూసుకుంటూ, మంచి నటనను రాబట్టుకున్న ఘరానా దర్శకుడు మీరు, కీరవాణి గారు, నిర్మాత దేవీ వరప్రసాద్ గారు ఈ విజయానికి మూలస్థంబాలు’’ అని రాఘవేంద్రరావుపై తనకున్న గౌరవాన్ని, అభిమానాన్ని చాటుకున్నారు. కాగా, ‘ఘరానామొగుడు’ సినిమా ఇప్పటికీ టీవీలో వస్తే వదిలిపెట్టకుండా చూసే ప్రేక్షకులు చాలా మందే ఉన్నారు. కార్మికుల సంఘం నాయకుడిగా చిరంజీవి నటన, కంపెనీ యజమానిగా నగ్మ పొగరు సినిమాకు హైలైట్. అలాగే, యం.యం.కీరవాణి అందించిన అన్ని పాటలు సూపర్ హిట్. ఈ సినిమాలో వాణి విశ్వనాథ్, రావుగోపాలరావు, కైకాల సత్యనారాయణ, బ్రహ్మానందం, శరత్ సక్సేనా, రమాప్రభ, ఆహుతి ప్రసాద్ ముఖ్య పాత్రలు పోషించారు. ఇంతకీ ఇది రీమేక్ సినిమా. కన్నడ సూపర్ స్టార్ రాజ్‌కుమార్ నటించిన బ్లాక్ బస్టర్ ‘అనురాగ అరళితు’ (1986)కు రీమేక్‌గా ‘ఘరానామొగుడు’ తెరకెక్కించారు. ఇదే సినిమాను తమిళంలో రజినీకాంత్ హీరోగా ‘మన్నన్’ (1992) టైటిల్‌తో పి.వాసు తెరకెక్కించారు.

from https://ift.tt/2UWyib0