‘సాహో’: విశ్వాంక్‌గా అరుణ్ విజయ్.. స్టైలిష్ లుక్‌లో తమిళ నటుడు

మనం హాలీవుడ్ యాక్షన్ సినిమాలు చూస్తే అందులో హీరో దగ్గర నుంచి విలన్ వరకు అందరూ చాలా స్టైలిష్‌గా కనిపిస్తారు. ప్రతి ఫ్రేమ్ ఎంతో రిచ్‌గా ఉంటుంది. ఇప్పుడు ‘సాహో’ పోస్టర్లు చూస్తే అలానే అనిపిస్తోంది. ఇది అంతర్జాతీయ స్థాయి సినిమా కాబోతోందని అర్థమవుతోంది. ‘సాహో’ విడుదల తేదీ దగ్గరపడుతోన్న తరుణంలో సినిమాలోని ఒక్కో పాత్రను పరిచయం చేస్తున్నారు. ఇప్పటికే ప్రభాస్, శ్రద్ధా కపూర్ పోస్టర్లు వచ్చాయి. ఈ పోస్టర్లు హాలీవుడ్ రేంజ్‌లో ఉన్నాయని అంతా అన్నారు. సోమవారం నీల్ నితిన్ ముఖేశ్ ‘జై’ పాత్రను పరిచయం చేశారు. నీల్ లుక్ చాలా స్టైలిష్‌గా ఉందని అంతా కొనియాడారు. తాజాగా నటుడు అరుణ్ విజయ్ లుక్‌ను విడుదల చేశారు. తమిళంలో పలు సూపర్ హిట్ చిత్రాల్లో విభిన్నమైన పాత్రలు చేస్తూ మంచి గుర్తింపు తెచ్చుకున్న అరుణ్ విజయ్ ‘సాహో’లో విశ్వాంక్ అనే పాత్రలో నటించారు. ఈ లుక్‌ను మంగళవారం విడుదల చేశారు. పోస్టర్‌లో అరుణ్ విజయ్ లుక్ చాలా స్టైలిష్‌గా ఉంది. భారీ ఖర్చుతో తెరకెక్కిస్తున్న ఈ యాక్షన్ ప్యాక్డ్ సినిమాలోని ప్రతి పాత్రకు ప్రాధాన్యత ఉంది. అలాగే అరుణ్ విజయ్ పాత్ర సినిమాలో చాలా కీలకం. ‘‘Blood Doesn't Need Bloody Invitation’’ అనే క్యాప్షన్‌ని బట్టే ఈ క్యారెక్టర్ ఎంత పవర్‌ఫుల్‌గా ఉండనుందో అర్థం చేసుకోవచ్చు. కాగా, ఈ భారీ చిత్రాన్ని యూవీ క్రియేష‌న్స్ ప‌తాకంపై వంశీ, ప్రమోద్, విక్రమ్‌లు ఎంతో ప్రతిష్ఠాత్మకంగా నిర్మిస్తున్నారు. యంగ్ డైరెక్టర్ సుజిత్ ఈ చిత్రాన్ని తెర‌కెక్కిస్తున్నారు. అత్యంత భారీ బ‌డ్జెట్‌తో హై స్టాండ‌ర్డ్ టెక్నాల‌జీతో తెరకెక్కుతుంది. ఈ చిత్రం అగ‌స్టు 30న ప్రపంచ‌వ్యాప్తంగా విడుద‌ల చేస్తున్నారు. ‘బాహుబలి’ లాంటి బ్లాక్ బస్టర్ త‌రువాత ప్రభాస్ హీరోగా వ‌స్తున్న చిత్రం కావ‌టంతో రెబ‌ల్‌ స్టార్ ఫ్యాన్స్‌తో పాటు దేశ వ్యాప్తంగా ఉన్న సినీ ప్రేమికులు ఈ సినిమాపై భారీ అంచ‌నాలు పెట్టుకున్నారు. అందుకే సినిమాకు అత్యుత్తమ క్వాలిటీతో ప్రేక్షకులకు అందించాలని ఎక్కడా కాంప్రమైజ్ కాకుండా తెరకెక్కిస్తున్నారు. ఈ చిత్రం ఏక కాలంలో తెలుగు, తమిళ, హిందీ భాషల్లో విడుదల కానుంది.

from https://ift.tt/2KtWHhR