వైద్య సిబ్బందికి తన హోటల్‌లో ఉచిత బస.. సోనూ సూద్ పెద్ద మనసు

విలన్‌గా, క్యారెక్టర్ ఆర్టిస్ట్‌గా బాలీవుడ్, టాలీవుడ్‌లో మంచి క్రేజ్ సంపాదించుకున్న నటుడు సోనూ సూద్ తన మంచి మనసు చాటుకున్నారు. కరోనా వైరస్‌‌పై పోరాటంలో విశేష కృషి చేస్తున్న వైద్య సిబ్బందికి సాయం చేసేందుకు ముందుకొచ్చారు. కరోనా వైరస్ రోగులకు చికిత్స అందిస్తున్న వైద్య సిబ్బందికి ముంబైలోని తన హోటల్‌ను ఇస్తున్నట్లు ప్రకటించారు. సిబ్బంది తన హోటల్‌లో ఉండొచ్చని చెప్పారు. ఈ విషయాన్ని ఇప్పటికే ముంబై మున్సిపల్ అధికారులకు, ప్రభుత్వ, ప్రైవేట్ హాస్పటిల్స్ దృష్టికి తీసుకెళ్లినట్టు వెల్లడించారు. కరోనాపై పోరాడుతున్న వారికి సాయం చేయడాన్ని గౌరవంగా భావిస్తున్నట్టు సోనూ సూద్ తెలిపారు. ‘‘ప్రజల ప్రాణాలను కాపాడేందుకు రోజంతా శ్రమిస్తున్న వైద్యులు, నర్సులు, పారా మెడికల్ సిబ్బందికి చిన్న సాయం చేసే అవకాశాన్ని గౌరవంగా భావిస్తున్నా. వాళ్లంతా ముంబైలోని వివిధ ప్రాంతాల నుంచి వచ్చి సేవ చేస్తున్నారు. వాళ్లు విశ్రాంతి తీసుకునేందుకు ఒక చోటు కావాలి. అందుకు మా హోటల్‌ను వినియోగించుకోవాలని మున్సిపల్, ప్రైవేట్ ఆసుపత్రులకు తెలిపాం’’ అని సోనూ సూద్ పేర్కొన్నారు. కాగా, ముంబైలోని జుహూ ప్రాంతం శక్తి సాగర్‌లో సోనూ సూద్ కుటుంబానికి ఆరంతస్తుల హోటల్ ఉంది. Also Read: ఇక సోనూ సూద్ సినిమా విషయానికి వస్తే.. ‘హ్యాండ్స్ అప్’ సినిమాతో ఆయన టాలీవుడ్‌కు పరిచయమయ్యారు. అయితే, పూరి జగన్నాథ్ దర్శకత్వంలో వచ్చిన ‘సూపర్’ సినిమాతో సోనూ సూద్‌కి మంచి గుర్తింపు వచ్చింది. ఆ తరవాత ‘అరుంధతి’ సినిమాలో పసుపతిగా తన నటవిశ్వరూపాన్ని చూపించారు. ఈ సినిమాలో నటనకు గాను బెస్ట్ విలన్‌గా నంది అవార్డు కూడా అందుకున్నారు. ఇక అక్కడి నుంచి తెలుగులో ఆయన అవకాశాలు బాగా పెరిగాయి. చాలా మంది స్టార్ హీరోలకు ఆయన విలన్‌గా నటించారు. ఆయన చివరిగా ‘సీత’ సినిమాలో విలన్‌గా కనిపించారు. ఇప్పుడు ‘అల్లుడు అదుర్స్’ సినిమాలో నటిస్తున్నారు.

from https://ift.tt/3eaMmWa